2023年F1已喺個幾月前謝幕。Red Bull RB19有幾「火星車」已經係過期topic，車迷嚟緊可能更為關注纏繞多時嘅track limits爭議（同埋鬧劇）去到2024年新賽季有冇望得到解決。車手過彎時有意無意出咗界，喺賽車界唔係新鮮事，但點解去到近年超越track limit先至成為F1、WEC等賽事嚴打嘅事項？原來主要都係同安全考慮有關。

話說新式賽場好多時喺賽道外仍留有一大片蠟青地， F1、WEC呢類賽車如果下下都衝咗出界外，蠟青地整慢賽車嘅效能遠遠唔及傳統嘅草地同碎石地，但與此同時圍喺賽道外嘅防撞欄吸收撞擊力嘅預算，又係建基於賽車冇超出track limit之下所能造出嘅能量。當兩樣嘢加埋一齊，後果可大可小。咁冇辦法，喺現時無比注重安全嘅時代，解決方法就只能係引入罰則，「逼」車手唔好過界。所以F1捉track limit唔係純為咗禁止車手抄捷徑（國語有種叫法「切西瓜」都幾傳神），就算賽車喺較遠嗰邊出界、出彎過咗龍，只要四條胎都離開晒預先畫好嘅白界，都屬於超出track limit嘅個案。出晒界嘅嗰一圈取消lap time之餘，正賽過界次數累積得多就更需要接受罰秒。

理念同罰則講就簡單，但玩得賽車當然就係下下搏盡，有時路面情況異常、賽車／輪胎不在狀態，車手失去預算，都唔係有心偷雞但就已經飛出界外。跑F1嘅Hülkenberg喺2023年卡塔爾GP就投訴過人在車中根本好難睇得到路邊條白色track limit確實喺邊。超跑方面車手就更加叫晒救命，因為車廂、座位一系列嘅設定根本唔會俾佢地望得清條界。更加唔好講負磅嘅影響：近20年F1「增肥」咗200kg，Hypercar亦都係由LMP1年代起計重咗接近200kg，大家啲車都係笨拙咗，急起上嚟想救車唔踩界並唔係想像中咁容易。

用於賽車捉track limit嘅方法都有幾種：有喺彎角裝特別攝影機，再叫人用肉眼check「快相」。GPS系統已經出現，但普及仍需要啲時間。以MotoGP為例，佢哋除咗裝cam，更會喺一啲越界黑點裝埋sensor，只要偵測到賽車出晒界，Race Control就會即刻收到通知，亦能夠隨即將消息send到去賽車個錶板上。

至於F1，直至去年為止都係停留咗喺聽落比較笨嘅「純人眼偵測」，呢種方法喺2023年奧地利Spielberg呢條偏短、多落斜彎嘅賽道上終告「爆廠」：正當FIA表示自己盡晒力，數到8個罰秒個案（同一車手捉到4次就罰5秒，罰則會一直遞增）Aston Martin不服上訴，佢哋更遞咗自己嘅「小器簿」出嚟……最終FIA職員共硬啃咗1,200次懷疑違例個案，其中83次成立，要罰秒嘅判決從8個激增至20個，到公佈終極賽果時已係當晚9點半，前列車手排名已經同直播所見嘅畫面嚟個大兜亂。咁大家之前坐定定睇live又為乜呢？

FIA都知咁搞落去唔係辦法。去到2023年最尾一場阿布扎比GP，FIA喺賽事期間進行咗一系列幕後AI測試，不過今次AI嘅功能唔係代為做判決，而係代替人手處理最慘無人道嘅篩選工作，目標係將需要人類判斷嘅疑似case從每場約800次大幅減到去50次。FIA好樂觀地預期track limit爭議去到2024年就可以根治，但呢種「影像裁判」會唔會同英超VAR唔爭得多少？例如2023年美國GP（Austin），Red Bull嘅Sergio Perez俾人多次發現喺T6違規，最終卻係因為現場個cam裝錯位，乜都影唔到之下就咁放生咗Perez。呢類耐人尋味嘅human error，並唔係AI所能解決得到。

相關內容:

---