Renault改用Alpine名義參加F1兩季，就已經將McLaren喺老四位置拉落嚟，全隊上下自然心雄想再進一步。Alpine今年推出A523，目標係喺已有基礎上爭取更多上頒獎台嘅機會。

Alpine法國基地主管Bruno Famin形容，去年A522賽車嘅最大問題在於水泵嘅連接，雖然2022賽季已做咗好多控制損失嘅調節，但始終水泵就係去年多次退賽嘅元凶，重新設計水泵在所難免，只不過咁樣一整會影響到引擎其他部分需要重新設計，一切只好留待設計新車A523時一次過解決。新車接受廠內測試嘅結果屬於正面，Famin都好穩陣補番句「一切留待上到賽道先至有定論」。

A523較明顯嘅改動在於一前一後。A523車鼻延伸得更前，已連到前翼最底嘅一層，而呢一層前翼亦造到係中間位置高於兩側。尾軸方面，A523就同步進行大型改動，就係將去年嘅後避震拉桿改為推桿，為擴散器騰出更多空間，亦帶來更佳嘅散熱效果。

從側面睇，Alpine新車嘅側箱大致保留咗去年A522嘅外觀，唔似其他中游隊伍咁樣紛紛將入氣口扁平化然後喺下方狠狠挖一個undercut位出嚟，但如果從上面俯視，就會見到A523原來都有「抄考」Ferrari嘅凹槽概念。技術總監Matt Harman已經表明賽季一開始就會推出外觀上有明顯分別嘅部件更新，可以做定心理準備現時發佈咗嘅A523係未見晒真章。

相關內容:

---