Mercedes係2022年既巴林測試中縮小側箱至接近零側箱設計。對比起另外9支車隊既賽車，W13既設計理念可以話係完全自成一格。

W13既窄側箱設計當調整到超貼地既情況下的確可以發揮岀超強性能，只不過考慮到propoising對車手造成既影響，車隊只能夠將賽車調高，無疑抵銷左W13既aero優勢。另一個W13既問題係賽車嚴重超重，平治係2022賽季重點改善空氣重力效率，多次既升級套件雖然改善賽車既氣動力表現，不過就未有為賽車減重。要知道賽車每重10Kg單圈成績大約會慢0.3秒。呢兩個問題令到W13係2022賽季既表現大受影響。

來到2023賽季，Mercedes發佈既新車W14繼續沿用W13既窄側箱設計。W14採用全黑色既設計，車身大部分面積唔需要塗裝，令到賽車既重量非常接近規例既最低下限798kg。

其他賽車既側箱，某程度將前轆產生既亂流引導離開車身，減少對車尾氣動效率既影響。Mercedes因為採用窄側箱設計，賽車需要係底板(Venturi tunnel/floor edge)既位置安裝大量既渦流產生器/導流板。將前轆產生既亂流帶離車身，作用類似改例前既barge board。不過似乎舊年既W13未能實現呢套原理，導致部分亂流影響車尾既氣動力效率，造成下壓力不足。W14重新設計底板既氣動力裝置，同時加大部分側箱，防止亂流過早重新貼近車身，減少亂流影響進入車尾beam wing既乾淨氣流，影響賽車既氣動力表現。