冠名為Alfa Romeo 的Sauber進入2023年要面對唔少變化：領隊Frédéric Vasseur獲Ferrari邀請過檔之餘，已計劃2026年進軍F1嘅Audi亦已經買入Sauber 25%，同時引入新CEO Andreas Seidl。

Alfa Romeo成績由前年第9躍升至去年嘅第6，車隊想再進一步，但暫時未有明確的訂立目標，始終今年F1中游位置嘅競爭預期將會更加激烈。回顧2022年下半程，Ferrari有見引擎故障頻生，無論係自用引擎抑或提供俾其他車隊嘅引擎都tune低咗性能，採用Ferrari引擎嘅Alfa Romeo自然無法倖免。

車身方面，Alfa Romeo去年推出C42，喺冷卻系統方面採用咗較激進嘅設計，但就導致後懸掛難以發揮，今年C43從側箱、引擎蓋以至後懸掛都有從新設計。至於前部則保留咗較強嘅C42影子，據技術總監Monchaux解釋，車頭變化睇起嚟較細係因為將資源集中喺車尾應會帶嚟更大效益。

C43側箱入氣口十分似去年嘅Ferrari F1-75，隨後部分則可以話係將去年嘅Red Bull RB18直接移植過嚟：用大幅向下斜嘅外殼將清潔氣流從上方帶到底盤兩側、擴散器上方與及beam wing。為咗令新設計同後懸掛更夾，Alfa Romeo改用咗舊年開設自行設計外觀嘅Ferrari變速箱。

底盤方面，C43應對2023年新例要求升高15mm嘅方式係喺兩側各配上9塊「小葉」，喺行駛時可以製造小渦流。Monchaux認為呢啲設計足以抵銷新例帶來嘅下壓力損失。