經過2022年新例大洗牌，Williasms跌番落製造商積分榜榜尾位置，僅得8分。而喺2023新車發佈之前，小道消息傳出Gulf Oil冇同McLaren續約之後會改與Williasms整單「大deal」，搞到一眾車迷幻想傳統藍、橙色Gulf拉花可以重現江湖，只可惜FW45揭曉一刻只見到仍係近年嘅一套藍色主調，傳聞中Gulf只係帶來3、4百萬歐羅嘅資金，不足以令近年陷入谷底嘅Williams即時反彈。

Williams FW45嘅開發重點在於側箱，入氣口更為扁平嘅同時下方嘅undercut亦造得更為明顯，而引擎蓋去到後方同好幾隊一樣都明顯凸起。早在去年嘅FW44，工程師已經想幫個車尾收細以增加下壓力，但因為會大規模郁到散熱部件嘅佈局而作罷。直至休季期間，呢單大工程終於可以喺FW45身上實現。

Williams 賽車性能主管Dave Robson參考咗FW45第一批數據，形容新車係有希望嘅，而模擬器得出嘅數據亦支持Robson嘅睇法：從虛擬試跑嘅表現可見，經過修整前懸掛，去年十分困擾車手嘅「突然失衡」問題已經解決。接落嚟就要睇落場測試能否證實到呢份咁令人振奮嘅模擬測試結果。