同去年一樣，10隊F1之中又係Haas搶先發佈新車，亦同去年同一做法，Haas呢部發佈版VF-23講明有好多美術、視覺上嘅加工，只係隱約確認到新車保留咗較闊身嘅車鼻，與及類似去年後期版嘅Ferrari風格大sidepod，較明顯嘅改動則有將收細咗嘅engine cover面積換嚟一片shark fin回歸，單憑外表其實好難評論同上一代VF-22有啲乜嘢重大變化。

Haas技術總監Simone Resta形容VF-23外表上雖然似係VF-22嘅改良版，但其實要配合空氣動力嘅效能，內裡嘅部件已經進行咗大量重新設計嘅工作。車隊繼續同Ferrari 有密切既合作關係，全車使用大量Ferrari 既零件，再Simone Resta呢位前Ferrari既工程師作為技術總監，呢部VF-23唔多唔少都有F1-75/SF-23既基因。再配合經過改善既Ferrari 動力單元，要進佔車隊中游位置應該唔會太難。

而喺去年嘅Abu Dhabi季後測試，取代Mick Schumacher位置嘅德國同鄉Nico Hülkenberg 就已經落場認識去年嘅戰車VF-22。Haas嘅工程師團隊喺近幾年已經累積到唔少經驗，但因為近兩年車手經驗較淺，或會少咗啲老到、重要嘅場上feedback資訊去做修正。時至今日Haas兩個車手都已經有多年F1經驗，不論技術交流質量以至正賽時嘅穩定性都有望得到提升。