喺今年跑新加坡站之前，車迷最關注Red Bull可唔可以超越1988年嘅McLaren（16場15勝），造出全年全勝嘅完美紀錄。咁而家大家當然知道，Ferrari嘅Carlos Sainz就喺新加坡呢場街道賽中斷咗Red Bull美夢。

一般認為Red Bull喺新加坡忽然變成「溜冰」，同F1賽會新推出嘅Technical Directives好有關係：TD18進一步限制咗前翼、尾翼嘅彈性，而針對底盤與量度車身離地高度嘅「木板」嘅TD39則更被認為係專門「招呼」Red Bull：兩塊板之間嘅隔熱物料從此被禁、同時亦唔再俾鎖緊兩者嘅螺絲凸出。理論上呢兩招都冇被禁嘅話，Red Bull賽車可以再降低多2mm都唔洗disqualified，Mercedes有工程師推測，佢哋學埋Red Bull呢招嘅話圈速可以再減多半秒。

Red Bull領隊Christian Horner冇正面回答新加坡站確實係衰乜，只係話唔關新TD嘅事。顧問Helmut Marko就推到更遠，話現時套simulator其實搞唔掂街道賽。聽起嚟亦不無道理，參考番較早前嘅摩納哥站，Red Bull係見「頭哥」Alonso跑出一個絕佳時間，「韋少」Verstappen先至有得睇住嚟打，喺最後一個sector幾乎每個彎都擦晒欄先至快得過Alonso搶番個pole。

至於Sainz對於自己喺新加坡站得米嘅分析則係：Ferrari SF-23剛好適合跑新加坡呢種以轉彎半徑較細嘅彎為主（呢個亦係Horner少有承認RB19嘅弱點）、左-右以至直路-彎角切換較多嘅賽道，加上賽道上冇乜風，氣溫變化唔大，喺變數較少之下自己先可以靠玩「俾後車開DRS追貼自己」呢類把戲將P1位置守到完場。

而SF-23胎耗過大嘅問題根本冇解決過，今季推出嘅幾次更新都只能稍為止蝕，一去到超熱嘅日本站Ferrari立即打回原形。Ferrari領隊Frédéric Vasseur承認一切只能寄望2024，到時新車將會喺sidepod位置cut得更深，再加上重新設計嘅波箱……聽起嚟都似係會再一次向RB 19致敬。

Red Bull番到Honda引擎老家日本即刻大發神威。韋少喺排位賽拋離第2名McLaren嘅Piastri差唔多0.6秒，正賽前更向車隊承諾要贏夠20秒，咁最終「只係」贏19.3秒車隊又肯唔肯收貨呢？

相關內容:

---