F1喺2021年英國站首次引入「衝刺賽」模式，更準確嚟講衝刺賽應該歸類入sprint qualifying而非sprint race，事關呢個原定喺race weekend星期六進行嘅100km「短途賽」，佢嘅最終排名先至係星期日正賽嘅排位（sprint race嘅起步排位則由星期五的qualifying成績決定）。賽會為咗吸引車隊同車手努力比賽，除咗有額外獎金外，亦會為三甲車手提供積分，但就只係首名3分、次名2分、第三1分咁大把，對於近年行慣正賽冠軍獲25分嘅制度嘅車手嚟講，sprint race無疑係件雞肋。

2021年跑過3場sprints之後，各方反應好壞參半，只能以不過不失嚟形容。主因係回報低之餘更對車隊、戰車、車手都帶嚟更多消耗同不確定性（始終正賽最緊要），而2022年想由3場擴充至6場嘅計劃亦因為車隊、車手反應冷淡而擱置，只係將積分制度改為頭8名都有分（由最多8分至最低嘅1分）。

【2023 F1 衝刺賽新制及其理念】

付出唔少、收獲一般，係車手唔願意喺sprint搏盡嘅原因之一。賽會喺4月頭澳洲站再拋出新諗頭：sprint、正賽各自擁有獨立嘅排位賽。每逢係有sprint嘅race weekend，正賽嘅qualifying安排喺星期五緊接free practice進行，而星期六則會完全係sprint嘅天下：喺sprint正賽之前、依家正名為sprint shootout嘅預賽之中，車手同樣係以Q1、Q2、Q3嘅淘汰制形式決定排名。對比起一般race weekend既13套車胎(8紅3黃2白)，sprint week車隊得12套車胎(6紅4黃2白)，為咗避免再增加額外輪胎消耗，sprint shootout訂明Q1、Q2只能用中性車胎、Q3則規定用軟胎，而呢三節預賽的限時亦會分別限住係12分鐘、10分鐘同8分鐘。唔同時段限用指定種類車胎，呢種玩法正正係由原定再下一站Emilia-Romagna GP首試嘅正賽排位賽新制複製過嚟。

星期六玩「全日sprint」，賽會係希望喺本來FP1>Sprint Qualifying>FP2>Sprint>Race嘅流程之中抽走反高潮味道甚濃嘅FP2。與此同時，當sprint嘅最終排名影響唔到正賽排名，唔少車手都認為可以喺sprint揸得盡啲但如果問到Verstappen嘅話佢未必會俾到咁好反應。「韋少」開季頭三場已經展現絕對優勢，當然係越少「花臣」對自己越有利。不過換著從賽會角度去諗，當現行Concorde Agreement規定賽季要跑夠25場嘅話需要10支車隊全票支持，喺既定賽事之中盡量加插sprint依然係最可行兼務實嘅「打雞血」招數。