McLaren 2022年俾Alpine擠落車隊榜第5名，今季已將目標定為重上第4，並將希望寄託喺紀念創隊60周年嘅MCL60身上。但與此同時車隊又食咗誠實豆沙包，承認呢個冬季嘅進度不如人意，喺第一期重大更新出現之前都要咬緊牙關頂住上。

從表面睇，MCL60繼承上一代MCL36嘅前避震拉桿（pullrod）配後避震推桿（pushrod）組合，至於車鼻、前翼嘅改動亦唔明顯。事實上McLaren工程師都將心機花喺改良側箱、底盤與及車尾方面。同唔少車隊一樣，McLaren嘗試「整合」Red Bull同Ferrari嘅設計，首先會見到狹窄入氣口之後隨即喺下方嚟個undercut就係向Red Bull「致敬」（Alfa Romeo、Williams、Alpha Tauri都採用近似設計），側箱上方則有一組長長類似「Ferrari式」嘅坑道，將空氣帶去底盤兩側以至擴散器嘅方向。從以上設計可以推測McLaren已經大改咗散熱器嘅佈局。

McLaren一眾工程師仍然需要奔波勞碌多一排，事關車隊嘅新風洞與及simulator最快都要今年之內先至用到，技術團隊暫時仍然需要摸去德國科隆借用豐田嗰一套較早期嘅研發設備，就算新設備如期投入服務，都應該只會幫助到2024賽車嘅研發，McLaren想2023年即刻重返前四，路途似乎會有啲崎嶇。