2023一級方程式賽車分析 - Ferrari SF-23

賽車資訊 | 2023 一級方程式賽車 | 發布日期: 02/03/2023

Ferrari係2月14日發布2023賽季既賽車:SF-23。賽車設計大致與2022年既F1-75相同，不過都有唔少地方經過重新設計。

首先就係前翼設計。SF-23係前翼第3層與第4層之間，每邊設有5個渦流產生器。類似既設計早係2022年美國站W13既升級套件上岀現。當時賽會以設計違背改例原意為由，禁止Mercedes既升級前翼岀賽。前翼既渦流產生器有效加強前翼本身所產生既Outwash，同時產生既渦流有效將前轆產生既亂流帶離車身，從而提升賽車既氣動效率。Mercedes係舊年聲稱渦流產生器只會為賽車帶來好少優勢。假如SF-23既設計獲賽會接納，相信會有唔少車隊跟風採用類似既設計。

photo by: Ferrari

車身方面，SF-23既前轉向架重新設計，轉向軸改為更貼近下層搖臂(wishbone)既位置。轉向軸作為前懸掛系統最重既部件，新設計可以令車身重心下降。同時前懸掛系統既部件採用流線造型，進一步減少對氣流既影響。

SF-23既側箱設計基於F1-75既設計進行大量改進。新車既側箱入氣口比F1-75更扁平，與此同時側箱進氣口下方新增一個切口，相信係連接駕駛艙側面既岀氣口，形成類似S-Duct既設計。規例列明切口只用於散熱用途，所以估計S-Duct內係設有電子元件既散熱器。由於氣流流過前懸掛系統會產生亂流，新增既S-Duct有效將呢部分既亂流、dirty air引導到側箱上既盆型結構，會合散熱器所產生既氣流，再引導到車尾尾翼。配合側箱下方與底板之間既結構全新設計，令到係側箱下方既氣流更乾淨，流向車尾底部既擴散器，提升工作效率，令到氣動力效率提升。