Alpha Tauri喺紐約發佈嘅所謂「新車」只係套用咗2023年新塗裝嘅AT03，純粹用嚟幫自己個服裝品牌做宣傳。真係用嚟跑2023年賽季嘅AT04則只係喺網上展示咗一批電腦繪圖嘅版本。

單從呢批電腦繪圖去睇，AT04同幾隊中下游隊伍一樣先後向Ferrari、Red Bull「致敬」：側箱入氣口由往年嘅正方形變做同舊年部Ferrari幾乎一樣咁扁平，而側箱上方用一組淺槽將空氣帶去後方，則幾似舊年更新版嘅Red Bull RB18。Alpha Tauri聲言嚟緊會減少直接從Red Bull購買現成parts，等Alpha Tauri喺aero設計上冇咁大制肘，但話口未完就見到AT03後懸掛嘅拉桿嚟到今年AT04已經跟埋Red Bull轉用推桿。

Alpha Tauri較受注目嘅變動其實在於車手組合。日本嘅角田裕毅俾人感覺係已經難再有突破，同「閨密」Pierre Gasly過於融洽可能會反而令雙方冇咗競爭向上嘅氣氛。如今Gasly已經改投Alpine，Alpha Tauri引入嚟自Mercedes青年軍兼且受到好評嘅Nyck de Vries，即管就睇下角田裕毅喺新衝擊之下能否再進一步，否則今年好大機會係佢嘅最後一年F1。