27/09/2022 英格蘭 vs 德國 - 賽前分析
足球資訊 | 歐國聯(2022/2023) | 發布日期: 27/09/2022
直播資訊: UEFATV
儘管歐國聯有幾雞肋都好，A3組睇怕都唔會有人預料5輪過後係匈牙利排榜首，英格蘭5場比賽2和3負搞到降級亦都令人大跌眼鏡。雖然有呼聲要求改請新新近「落車」嘅德國教頭Tuchel未免吹得太大，但Southgate話晒帶過英格蘭殺入世界盃四強、歐國盃決賽，亦係唔少年輕國腳嘅啟蒙導師，踏入2022表現就總係俾人一種保守、見底嘅感覺，繼續起用已喺曼聯失勢嘅後衛Maguire亦為人詬病。今晚英格蘭適逢新國王登基以來首次主場出擊，又遇著係牙骹戰老對手德國，估計喺後防線會有較多新嘗試之餘，整體上仍可以寄望全隊上下集中些少執番個尾彩。但如果好似坊間咁講Southgate今場非勝不可、輸埋就烏紗不保嘅話，就真係諗多咗。
作客嘅德國近況亦唔好得好多。A3組數字上仍有可能爬上第2，但大家都好懷疑有冇呢個能力。Flick接掌德國踢落都係冇嚟衝勁，其中一大問題係Flick呢套4-2-3-1左右兩閘一直都搵唔到Mr Right：左閘首選一定係人氣急升嘅Raum，只不過Raum今季不論球會、國家隊都見唔到有咩亮點，右閘則連首選都談不上有，當踢法較少後上嘅Klostermann缺陣（韌帶撕裂，未知趕唔趕得切踢世界盃），就要起用踢右翼嘅Hofmann頂替，加上最前線Werner同樣係未有表現，整體可謂乏善足陳。今晚德國較大機會收番起一班球星方便向各大球會交人，Hofmann有機會踢番自己位置同時讓出右閘位俾Kherer「再考牌」，左閘亦可能會起用Plan B嘅Gosens，更有可能會見到Havertz站在最前線踢「假9」。德國既然大路組合擦唔出火花，換個面目再試一場都未嘗不可。
預計兩隊正選陣容：
【英格蘭】
Ramsdale - Stones, Tomori, Coady - Trippier, Bellingham, Rice, Chilwell - Foden - Sterling, H. Kane
【德國】
ter Stegen - Kehrer, Süle, N. Schlotterbeck, Gosens - Kimmich, Gündogan - Hofmann, T. Müller, Musiala - Havertz