主隊近況：WWDWL

客隊近況：WLWDL

對賽往績：克羅地亞 勝(2) - 和(0) - 西班牙 勝(2)

第3屆歐國聯決賽由上屆亞軍西班牙對應屆世界盃季軍克羅地亞。雙方近年多次交手，近3屆歐洲國家盃都有對賽之餘，就連歐國聯亦早已喺首屆同組撼過兩場，當中以西班牙稍佔上風。

與世界盃陣容相比，克羅地亞參戰歐國聯決賽週較大分別在於後防線，歐洲列強都想搶嘅RB萊比錫中堅Gvardiol未完全康復之下缺席，克羅地亞四強戰補時先至俾東道主荷蘭追和2:2，進入加時靠隊長Modrić助攻俾後備落場嘅Petkovic入球，最後再由Modrić自己射入十二碼以4:2取勝。另一邊廂西班牙對意大利同樣飽食驚風散，踢到88分鐘由後備前鋒Joselu射入奠勝一球。Joselu踢過西班牙U21後一直冇機會做大國腳，直至3月臨近33歲先至首獲徵召參加歐國盃外圍賽，至今踢3場入3球，可謂係一個異數。而首次代表國家隊上場即有正選嘅皇家蘇斯達中堅Le Normand亦有機會喺決賽繼續以正選身份亮相。

歐國聯開辦至今練兵嘅色彩仍然較濃，各國嘅爭標欲望同決心唔能夠一概而論，呢個時候外界就會較多寄望克羅地亞能夠開齋。克羅地亞繼2018世界盃獲亞軍後再喺2022年得季軍，唔少人都希望37歲嘅Modrić可以喺退出國家隊前拎番次冠軍兼幫呢一代嘅克羅地亞正名。

 

預計兩隊正選陣容：

【克羅地亞】
Livaković - Juranović, Vida, Šutalo, Perišić - Modrić, Kovačić, Brozović - Pašalić, Kramarić, Ivanušec

【西班牙】
Simón - Carvajal, Le Normand, Laporte, Alba - Rodri, Merino -  Asensio, Gavi, Fati - Morata

 

相關內容:

---