歐國聯2022 - 荷蘭
足球資訊 | 歐國聯(2022/2023) | 發布日期: 27/06/2022
歐國聯分組賽完成咗分組賽頭四輪賽事，荷蘭雖然兩場對威爾斯都係最後一刻先嚟絕殺，主場對波蘭亦係先落後兩球之下追平，但話晒第1場同比利時嘅大戰贏到4:1，其餘3場亦都係見到有好大程度嘅輪換，可以見到教練van Gaal係有善用呢幾場賽事去執靚隊波。與此同時亦見到荷蘭隊上下都越嚟越融入到van Gaal嘅3後衛打法。
荷蘭大勝比利時之後，波蘭醒水重兵防守de Jong，荷蘭嘅組織任務唯有轉移到Berghuis，無奈Berghuis未係必然主力，荷蘭踢出嚟效果始終冇咁好。加上今期冇入選嘅Wijnaldum疑似已經失寵，喺van Gaal呢套打法之下，25歲中場de Jong嘅作用極為重要。但當番到去球會比賽，因為巴塞隆拿嘅核心仍然喺33歲嘅隊長Busquets身上，de Jong踢唔番佢最擅長嘅鋪橋搭路角色，位置變得偏後，加上de Jong以前踢阿積士時嘅教練ten Hag已到咗曼聯，de Jong已經成為曼聯嘅頭號目標。
曼聯已經試過提出一個總額可以達到7千萬歐羅嘅offer，而巴塞係已經拒絕咗，但因為巴塞一直盛傳想買拜仁嘅Lewandowski，現時屬於巴塞最高身價級別嘅de Jong睇嚟又唔一定係非賣品。對於轉會傳言de Jong似乎唔想多提，話晒巴塞係佢嘅dream club，莫講話位置移後咗，今季對馬德里體育試過唔齊腳要佢改打右翼都毫無怨言。反觀國家隊嗰邊，自從van Gaal重掌荷蘭就即刻向de Jong保證會安排佢踢6號位，差異只在於要de Jong獨挑大樑定係會旁邊多一個中場傍住。De Jong自己亦承認荷蘭同巴塞嘅系統好唔同，而荷蘭嗰套係更適合自己。