歐國盃外圍賽重燃戰火，B組現時由5戰全勝嘅法國獨領風騷，少踢一場嘅荷蘭暫列第3，今晚本應係同組兩大熱門互撼嘅重要一役，可惜傷情嚴重令主場出擊嘅荷蘭倍添困難。

由朗奴高文接掌帥位嘅荷蘭每遇強隊都輸，歐國外上回合作客法國更係慘敗0:4。朗奴高文上次可以賴消化不良影響指揮，今次就更加大條道理：從中前場嘅絕對主力迪比、加普、法蘭基迪莊，以至中流砥柱迪歷特、保治文、貝侯斯、添巴，總之中前場噏得出名最有名氣嗰批都大多數倦勤。

反正人腳天殘地缺到咁，可以預計荷蘭會喺中場前會以新面目示人，當後防兩位大佬雲迪積克（Virgil van Dijk）、尼頓艾基（Nathan Aké）仍然「健在」，佢哋可以帶住新上位嘅基爾圖特亞（Lutsharel Geertruida）組成三人防線，掩護大有機會獲得首頂喼帽嘅白禮頓門將華布根（Bart Verbruggen），順便俾機會荷蘭多觀察下啲門將人選。中場就預咗會起用新仔撐場，迪魯恩（Marten de Roon）、杜費斯（Denzel Dumfries）、將要承擔更多領軍責任，前鋒方面域賀斯（Wout Weghorst）重返德甲仍未入過波，但對上兩場歐國外就各入1球，已成為荷蘭嘅入球希望。假如後防頂得住法國攻勢，話唔定又會見到雲迪積克以至尼頓艾基湧上前助攻。

相比之下法國陣容十分完整，甚至可以話係奢侈得多，事關當今場連中堅干拿迪（Ibrahima Konaté）都有得傷癒歸隊，迪甘斯係有本錢拎荷蘭嚟做試驗嘅對象：今季麥巴比（Kylian Mbappé）、高路梅安尼（Randal Kolo Muani）同時踢巴黎聖日耳門，基奧特（Olivier Giroud）、馬古斯杜林（Marcus Thuram）又分別效力米蘭雙雄踢意甲，迪甘斯可以進一步評估麥總身邊究竟應該優先起用邊一個。此外呢場賽事亦有機會另一位法國隊嘅稀客上場：馬賽右閘哥路斯（Jonathan Clauss）受制於迪甘斯嘅比賽風格，落選2022年世界盃大軍，今次哥路斯有得再次入選，即管睇下佢有冇機會取代成日話自己正職係中堅嘅柏華特（Benjamin Pavard），出任正選右閘。

 

預計兩隊正選陣容：

【荷蘭】
Verbruggen - Geertruida, Van Dijk, Aké - Dumfries, Reijnders, De Roon, Blind – Simons - Malen, Weghorst

【法國】
Maignan - Clauss, Konaté, L. Hernandez, T. Hernandez - Tchouaméni, Rabiot - Coman, Griezmann, Mbappé - Giroud