意大利與踢多一場嘅烏克蘭同得10分，喺歐國盃外圍賽C組緊隨英格蘭排第二、三。今晚意大利重返2021年捧盃嘅舊地溫布萊挑戰榜首英格蘭，就算口講話想用呢塊「福地」沖喜，明眼人都知意大利形勢比當年艱難得多。

史巴列堤執教意大利以嚟三場不敗，但係未對過強隊，今場作客英格蘭遇上人腳進一步削弱，想幫上手報番首回合主場一敗之仇談何容易。意大利球員賭波傳聞名單越傳越有，最近甚至燒到去紐卡素新上位防中東拿利（Sandro Tonali）身上，直接導致東拿利今期退出國家隊，錯過對馬爾他、英格蘭嘅兩場賽事（首席射手恩莫比利今期因傷同樣冇入隊），史巴列堤喺對馬爾他前亦都承認自己因此而有啲焦慮。前年EURO決賽喺溫布萊力壓英格蘭贏冠軍嘅三大中場華拉堤、佐真奴、巴列拿（Nicolò Barella），如今只剩低後者撐住，遇著對家條中場線越嚟越發光發亮，睇嚟意大利作客英格蘭稍微佔優嘅往績都係要暫時放埋一邊。

英格蘭上一個國際賽檔期未有安排踢外圍賽，改為留喺主場溫布萊友賽澳洲，小勝1:0之餘都俾咗機會考察更多球員兼俾主力留力應付今晚對意大利嘅正賽，只要拎到1分就已經足夠出線，身心都應該較對手輕鬆自如。如無意外今晚英格蘭將會擺出真打歐國盃時會出動嘅中場線：比寧咸（Jude Bellingham）加盟皇家馬德里即刻上位、呢位年僅廿歲嘅球員已經唔可以稱為「小子」，佢連同天價轉投阿仙奴嘅迪勤懷斯（Declan Rice）已成為英格蘭嘅「鐵膽」。假設修夫基一如既往擺出4-3-3陣勢，中場最後一個席位應會首選留俾曼城嘅加雲菲臘斯（Kalvin Phillips）。