主隊近況：WWWLW

客隊近況：LWWLD

對賽往績：英格蘭 勝(2) - 和(2) - 北馬其頓 勝(0)

歐洲國家盃外圍賽C組，英格蘭有個好開始，三月份贏咗呢組最強嘅意大利同烏克蘭，到上個星期五就以4:0 輕取馬爾他，而北馬其頓三月份贏馬爾他後，上星期領先兩球下反輸俾烏克蘭。今次英格蘭返到主場，雖然剛加盟皇馬嘅Belllingham因傷未有入選，但中場就有位新星：喺球會由右閘轉打中場嘅Alexander-Arnold，喺對馬爾他一仗光茫四射，不斷為隊友製造機會，仲有個靚入波，成為賽事最佳球員。英格蘭主場不嬲氣勢強勁，自2011年2:2和瑞士後，喺歐洲國家盃外圍賽主場賽事，已經連贏11場，其中10場仲最少入2球。

 

英格蘭嘅曼城五子，贏完三冠又慶祝完，第一場國際賽就先列後備。對馬爾他Southgate仍然沿用Kane同Saka攻堅，再搭Maddison。中場有著起十號波衫嘅Alexander-Arnold，佢喺去年世界盃前狀態麻麻，加上利物浦成績飄忽，結果落選世界盃大軍。直到近季尾，Klopp變陣將佢放喺中場，佢就有如放低防守包袱，差唔多每場都有助攻。Southgate當然有留意佢嘅表現，對馬爾他亦比佢試踢右中場。第一個入球就係佢妙傳比Saka，再由Saka傳中俾Kane時，馬爾他嘅後衛擺烏龍撞入，其後佢喺禁區外抽射成2:0，盡顯十號仔本色。賽後Southgate認為佢為球隊帶嚟新元素，預計喺Bellingham缺陣之下，Southgate仍會繼續試用呢位新中場playmaker。

 

對手北馬其頓並唔係魚腩部隊，去年佢哋喺世界盃外圍賽附加賽四強作客意大利，補時階段憑射手Trajkovski嘅入球，1:0絕殺應屆歐洲國家盃冠軍，令意國又再世界盃夢碎，佢哋只係最後喺決賽輸俾葡萄牙。星期五對烏克蘭，北馬其頓本來全取三分就有機會升上分組第二，上半場憑拿玻里中場Elmas遠射，半場領先2:0，但下半場烏克蘭連入三球，再加上Musliu兩黃一紅被逐，打少一個嘅情況下，比烏克蘭反勝3:2。輸咗呢場之後，北馬其頓同另外三隊同樣兩場得3分，以得失球差暫列小組第四。

 

預計兩隊正選陣容：

【英格蘭】
Pickford - Walker, Stones, Maguire, Shaw - Alexander-Arnold, Rice, Henderson - Foden, Kane, Rashford

 

【北馬其頓】
Dimitrievski - Ristovski, Zajkov, Velkovski, Alioski - Bardhi, Ademi, Elmas - Ashkovski, Nestorovski, Trajkovski

相關內容:

---