2024歐洲國家盃外圍賽C組，英格蘭同意大利，烏克蘭，北馬其頓同馬耳他同組。英格蘭首仗已經旗開得勝，以2:1贏應屆盟主意大利。嚟緊第二場外圍賽，正值俄羅斯入侵烏克蘭一周年，英格蘭作為烏克蘭嘅盟友，由去年三月開始，已經接收咗十一萬，逃離戰火嘅烏克蘭難民。為咗令佢哋可以現場支持自己嘅國家，英格蘭足總送出一千張門票比喺英國定居嘅烏克蘭難民，以及比佢哋寄宿嘅家庭。英格蘭同烏克蘭上次對碰，係2021年歐洲國家盃八強，英格贏4:0。其後烏克蘭戰火燃起，國內聯賽被迫中止。烏克蘭亦喺延期嘅世界盃歐洲區附加賽，輸比威爾斯，失去最後一張世界盃入場券，無緣晉身決賽周。

 

烏克蘭週中外圍賽輪空，但就早到倫敦積極備戰，星期四同賓福特踢咗場友賽贏2:0，Mudryk亦有上陣。Mudryk喺冬季轉會窗加盟車路士之時，曾經引起一場哄動嘅爭奪戰，最後以高價落喺車路士手中，可惜至今仍未能得到正選一席。雖然仍然係適應中，佢嘅爆發力以及單對單嘅個人突破能力，喺第一場英超對利物浦，已經盡顯功架。對李斯特城本來亦有一入球一助攻，只係入球被VAR推翻。領隊Rotan認為Mudryk年輕又有潛質，相信假以時日會成為英超嘅耀眼新星。佢嘅國家隊隊友Zinchenko就相反，一嚟到阿仙奴就成爭標重要一員，踢左閘時，佢經常引球出擊，製造壓力比對手，同中前場幾個攻擊球員合作無間。佢喺國家隊就司職中場中，擅長控球在腳，同為隊友穿針引線。早前有傳Zinchenko因為Mudryk轉會問題而嬲咗對方，Zinchenko就解釋，只係因為Mudryk揀咗車路士而感到失望。

至於英格蘭嘅歐洲國家盃外圍賽第一場，作客對意大利，上半場英格蘭鋒線三位球員非常活躍。英格蘭先憑Rice喺角球混亂中射入，完半場前Kane再入十二碼。佢喺三個月前嘅世界盃射失十二碼，間接令球隊出局，之後喺聯賽都不時被敵對球迷特別招待。佢入波後特別激動，除咗一吐烏氣，呢球亦令佢超越Rooney成為英格蘭國家隊史上入球最多嘅球員。下半場意大利積極搶攻，開始控制戰局追番一球，最後英格蘭驚險保住勝局完場，但Shaw就因為兩黃一紅，嚟緊對烏克蘭會缺陣，近況唔錯嘅Chilwell有機會填補佢嘅左閘位置。而James就喺比賽前夕，因大腿後肌輕傷而退隊。

相關內容:

---