歐聯四強首回合，曼城用盡九牛二虎之力先可以贏皇家馬德里4:3，但不得不留意奇雲迪布尼開紀錄嘅入球以及之後2:0嘅助攻都可圈可點：一開波冇耐馬列斯已經嘗試帶波殺入右邊禁區，貝拿度施華湧埋上右邊拉開對手防守，而加比爾捷西斯就衝向近柱，到呢一刻奇雲迪布尼都仍然係嘆緊慢板踏步上前，但就喺下一刻奇雲迪布尼已經立即箭步衝入隊友拉開嘅空檔，再頂入曼城嘅最快歐聯入球。及後奇雲迪布尼又妙傳俾加比爾捷西斯射成2:0。

奇雲迪布尼勁在佢擁有高超嘅球賽智慧，當要負責踢8號位，無論前傳定短傳，分波定自己上前，都能夠準確判斷。當曼城要轉攻為守，佢又會即時頂上第二個前鋒位，成為指揮全隊逼搶嘅指揮中心。上年歐聯決賽曼城輸俾車路士，奇雲迪布尼60分鐘傷出亦無疑係個轉捩點。今晚曼城只能帶住一球優勢作客皇馬，教練哥迪奧拿都知道好需要奇雲迪布尼：「佢就係當今最佳嘅中場。」

除咗前場需要有奇雲迪布尼繼續施展魔法之外，鞏固防守都係曼城當前急務。曼城近期對住強隊利物浦、皇馬都有失波。右閘基爾獲加上回合已經因傷缺陣，同一場有落場嘅史東斯則有傷在身，未肯定踢唔踢到次回合。如果中堅位要沿用魯賓戴亞斯、拿樸迪嘅組合，就難免令人擔心會重演上回合嘅不濟表現。至於主場嘅皇馬，上週末大幅度輪換之下仍然大炒愛斯賓奴4:0，一班主力都養精蓄銳迎戰曼城，唯一未知數係阿拉巴未知康復進度係點。