維拉利爾為咗備戰今晚作客拜仁慕尼黑嘅歐聯八區次回合，週末踢西甲時教練艾馬利將全隊正選收起，以副選賽和排名第一位嘅畢爾包。艾馬利就咁話：「其實西甲對我哋嚟講會緊要啲，但今場係對拜仁，對我甚至對全隊都係一次大考驗。」

拜仁上回合作客先輸0:1，參考歐聯往績，拜仁對西甲球隊紀錄稍差，7次作客先輸之後只有1次晉級。但考慮到今次對手只係西甲第7，加上又已經取消作客入球優惠制度，拜仁牌面上仍然佔優，問題只在於能唔能夠及時谷盡火力贏多過1球。

拜仁慕尼黑上星期六主場迎戰要護級嘅奧格斯堡，都未見得好醒神，只能憑一個十二碼小勝1:0。今晚對維拉利爾，拜仁教練拿高士文已經講到明需要班球員盡情釋放進攻，要令對方受壓、感到畏懼。中場兩翼位置估計會由穆斯亞拿、京士利高文接手，取代始終未谷得起嘅基拿比、利萊辛尼，務求用狀態最好嘅球員喺前場施壓。至於後防方面，有病在身嘅歷卡斯蘇尼繼續缺陣，中堅位置預計會係盧卡斯靴南迪斯、烏柏美卡奴拍檔。久休復出嘅艾方素戴維斯經過兩場正賽之後，狀態應已有所提升，有佢補番左閘位置嘅話拜仁嘅攻防切換應該可以做番季初咁流暢，有助全力搶攻。