法蘭克福好大機會留唔住法國前鋒Randal Kolo Muani。此子喺卡塔爾世界盃只有3次出場機會，但僅有嘅兩個入球分別喺四強對摩洛哥與及決賽對阿根廷時取得，隨後番到德甲繼續發亮，喺法蘭克福整體沉淪之際就得番佢呢個新加盟球員以超高效率撐住場面，全季各項賽事合共43個入球+助攻足以令各豪門垂涎。據transfermarkt估價，Kolo Muani身價已達8千萬歐羅，如果真係有球隊落bid，估計開價會上到1億。

法蘭克福上年直至季前熱身嗰期，都仍以為隊中皇牌Kostic可以留隊，勢估唔到轉個頭Kostic就已經去咗祖雲達斯報到。法蘭克福喺唔夠時間搵合適替補球員之下，左翼由最強位置變成缺口，或多或少都影響咗全季嘅發展，對於今季輪到Kolo Muani初到埗即人氣急升，法蘭克福當然都唔會想舊年場鬧劇重演多一次，但據路邊社消息指，法蘭克福都已經預咗Kolo Muani未到季初集訓都未定得到去留，皆因前鋒市場風起雲湧，Mbappé講明下季完後唔會再續約，PSG唔想人財兩失嘅話，最正路做法就係今季賣出Mbappé再搵代替品，同樣來自法國嘅Kolo Muani榜上有名，但與此同時PSG亦都對名氣更大嘅拿玻里尼日利亞前鋒Victor Osimhen感興趣，而睇中Osimhen嘅又唔只PSG一隊。形勢發展落去，睇怕好大機會又會出現遲來的報價，咁到時如果真係有球會開出1億歐報價，相信都唔會有人say no。

法蘭克福已經叫做學精咗，佢哋今次唔理Kolo Muani去留，都會密切留意代表德國踢U21 EURO嘅哈化柏林前鋒Jessic Ngankam。

 

相關內容:

---