上星期拜仁、曼城會師東京，友賽焦點好自然落入盛傳俾拜仁睇中嘅曼城隊長基爾獲加（Kyle Walker）。拜仁前排將法國中堅盧卡斯靴南迪斯（Lucas Hernández）賣俾巴黎聖日耳門，隨即喺拿玻里出動買斷價引入金玟哉，右閘方面嘅情況估計都會係咁上下：同樣係法國嘅後衛柏華特（Benjamin Pavard）字面上算係右閘，但佢已不止一次申請改踢自己最想打嘅中堅位置，所以不論係成功爭取抑或心灰意冷離隊，都會令拜仁更想接洽呢位33歲英格蘭老將。

另一方面，拜仁追逐英格蘭當打中鋒哈利卡尼（Harry Kane）嘅步伐並未停止。根據最新情報，拜仁嘅出價連同浮動獎金等雜項已推高到9500萬歐羅，拜仁都唔想影響新球季備戰，好大機會要喺本星期內作個了斷。拜仁啱啱將文尼（Sadio Mané）賣去沙特同C朗做隊友，3000萬歐羅相比之下唔算多，都叫做幫補一下哈利卡尼呢筆將有機會出現嘅天價轉會。