大家總係想睇現時欠債十幾億歐羅嘅巴塞隆拿點樣變錢，巴塞會長Joan Laporta就繼續表演俾大家睇。據當地電台報料，巴塞最新研究項目係另組一隊波去玩卡塔爾聯賽，成事嘅話單計每季出場戲金就高達1億歐羅。

基於西甲自家嘅財政公平競技原則，經常出現財赤嘅巴塞近年每季埋班都總係搞到拖泥帶水，事關每筆收入每份人工每宗交易都要計過度過、圍掂條數先至獲批，任何一步都會影響最後條大數。巴塞清洗咗佐迪艾巴（Jordi Alba）、布斯基斯（Sergio Busquets）等高薪老將，變賣電視轉播權等家產又一次過刮咗7億歐羅出嚟，2022/23帳面淨賺3億歐羅，加上早前爆出嘅「收買門」查查下又冇乜聲氣，睇嚟短期內都冇乜嘢阻止到巴塞再展拳腳。

巴塞為咗節省收購球員嘅總金額，近年買人一個特點就係多咗簽入大牌嘅自由身球員，例如繼2021年從曼城簽入阿古路（Sergio Aguero）後再喺曼城嗰邊0轉會費簽埋根度簡（Ilkay Gündogan），用「免簽」方法搵人才看似會較抵，但始終球會仍然需要支付唔少人工，唔啱用嘅話就要諗辦法甩手。正如上季從AC米蘭免簽番嚟嘅中場基斯爾（Franck Kessié），始終踢唔上正選，依家已經收到來自沙特阿拉伯嘅報價，巴塞為求keep住條數靚仔，怕且都唔會否定任何可能住。與此同時巴塞幾經辛苦先至重新同為加維（Gavi）簽訂成年球員合約，為咗保住佢以至一眾新世代嘅骨幹，法蘭基迪莊（Frenkie de Jong）就算再公開向球隊示愛幾多次都難以撲得熄巴塞矢志清洗舊人嗰團火。

講番根度簡，簽入呢位32歲嘅「老將」除咗唔洗俾轉會費之外又有咩著數？當考慮到巴塞送走咗撐住中場達15年嘅布斯基斯，剛贏到歐聯冠軍嘅通天老倌根度簡喺呢個時候接手，可能先至係幫助巴塞喺賽場上做到無痛轉型嘅靈丹。今次又見到巴塞棋高一著，又點能唔寫個服字呢。

相關內容:

---