"El Clásico" 2:1擊敗皇家馬德里，巴塞隆拿喺聯賽只剩12場之下lead住衛冕冠軍皇馬12分，今季西甲冠軍可以話已係囊中之物，所以當前嘅熱話並唔係冠軍誰屬，而係巴塞嘅「收買門」醜聞細節。至於衛冕接近無望嘅皇馬，照計都係時候開始著手研究新一季嘅人員配置。

西班牙報章El Mundo根據得到嘅單據爆料，指前西班牙裁判副主席Negreira喺2001至2018年期間從巴塞方面收受咗730萬歐羅，當中已花咗唔少喺一班下屬嘅球證身上：禮物、美食、靚酒，仲有家電同衣服.....巴塞方面繼續封嘴，即使贏埋呢場「西超打比」，巴塞主席Laporta都只係若有所指咁講咗句「我哋唔止會防守，還識得進攻。」

講就咁講，巴塞實情喺賽場外嘅其他戰線同樣捱打。西甲將巴塞同西班牙國家隊新貴Gavi嘅職業球員合約宣佈為無效，巴塞上訴亦已被駁回，結果會係Gavi變番做巴塞青訓球員身份，呢份翻生嘅舊合約會令Gavi到季尾時變成自由身球員，而本來職業球員合約中訂明嘅10億歐羅賣斷價亦會即刻清零。巴塞仍有些少時間再執靚一次自己盤數，去證明自己符合西甲嘅財務公平競爭要求兼重新綁住Gavi，但如果想找數帶Messi回家？依目前情況睇都只會係繼續吹水。

衛冕接近無望嘅皇馬唔係冇問題要處理，只係相比巴塞冇咁複雜，主要都係要解決賽場上嘅事項，例如快脆搵番個接到Benzema棒嘅射手。Benzema今季暫時缺席13場正式比賽，佢會話自己今季都入到19球波，但單計西甲實情就只得11球（西甲排第6），另外亦有3球係早前歐聯趁住大勝利物浦時獲得。而傳出嚟嘅名單上出現咗PSG嘅Mbappé與曼城嘅Haaland兩個大名。

教練Ancelotti亦似乎唔會坐喺帥位太耐，依家已經盛傳佢會轉教巴西，儘管Ancelotti口口聲聲話會留到皇家唔留人為止，但與此同時皇馬亦唔見得會對自家嘅教練留情。皇馬喺國家打比輸完僅僅半個月，就要再次作客巴塞進行西班盃四強嘅次回合。皇馬首回合主場full team輸0:1波己經失威，次回合如果追唔番，怕且高層又要開始諗吓有咩後繼者。另一方面歐聯都係重要一關，可以預期皇馬四強搞唔掂曼城／拜仁慕尼黑、甚至連八強都過唔到車路士嘅話，Ancelotti走人嘅成數都會更高。依家傳出嘅繼任人名單就已經有前球員Xabi Alonso（利華古遜）、Pochettino（PSG）、超級名宿Raul（西丙皇馬B隊），以至新鮮熱辣俾拜仁兜走嘅Nagelsmann......皇馬嘅選擇計落一啲都唔少。

相關內容:

---