Hamilton開季前高調預告下季轉投Ferrari，大家都戥Sainz唔值，但2024 F1唔經唔覺都過咗半季，Mercedes要神童新Kimi唔要Sainz，老家Red Bull兩隊亦都唔似有預佢，Sainz咁就卡住咗唔上唔落，亦因為Sainz可以話係市場中最有份量最有叫座力嘅車手，其餘未有著落嘅車手就只能繼續等。直至嚟到暑假前夕嘅比利時GP，Sainz嘅老豆、經理人都入咗Williams車房，似乎將要塵埃落定。

Sainz話晒家陣車手榜排緊第5，要揀車隊榜排尾二嘅Williams聽落好慘？但當分析番各隊情況同前景就未必咁諗。本來擺喺Sainz眼前最實際嘅選擇只有3隊：Alpine越做越沉，大量人材流失之餘亦都盛傳趁2026新賽制放棄自家品牌引擎改用Mercedes止血，咁嘅前景確係好趕客。2026會以Audi名義重新出發嘅Kick Sauber亦都越睇越kick，喺McLaren請過嚟開荒嘅CEO Andreas Siedl只係做咗一年多，轉過頭又話改請前Ferrari領隊Mattia Binotto打骰，Ralf Schumacher更提到Audi有傳「計錯數」所以要留住周冠宇同佢背後嘅資金。

Sainz九月就會踏入「三字頭」，喺呢個本來要盡力去衝嘅關鍵時刻先嚟失業，剩餘嘅選擇又唔見得好好，都可以估到佢十分難做決定。呢種情況下佢要求「1+n年」之類嘅合約「彈出條款」都好正常，但偏偏前景不明而又對Sainz最為渴求嘅Alpine與及Kick Sauber (Audi) 就係俾唔到呢個offer，反而就得Williams俾到。Williams呢兩年喺Albon揸盡之下間中交到成績，最近又招兵買馬，喺終日地震唔完嘅Alpine接收咗10位高級工程師，此消彼長Williams嚟緊不能排除會進佔中游位置。加上Williams肯喺合約設置「彈出條款」嘅話，只要Red Bull喺2025年有咩頭暈身㷫，Sainz呢個系出紅牛青訓嘅車手就有機會大搖大擺回歸，條數計落亦係大家win-win。

隨住F1進入暑假，不論係paddock中人以至廣大F1車迷相信都好期待Sainz去向可以趁今期塵埃落定。