費倫天拿同韋斯咸對上一個主要歐洲盃賽錦標，已經係半世紀前嘅事 (歐洲杯賽冠軍盃：費倫天拿1961，韋斯咸1965)。意甲球隊今季威盡歐洲，三大盃賽決賽嘅歐協聯代表有攻力強勁，雄霸射手同助攻榜嘅費倫天拿。對手韋斯咸呢兩季喺歐洲賽表現不俗，上季歐霸四強輸咗俾冠軍隊伍法蘭克福，今季去到歐協聯亦殺入決賽。領隊Moyes話球員會汲取上季嘅教訓，務求以最佳狀態出戰，希望將成就寫入史冊。兩隊除咗為名譽而戰，仲會爭取來季歐霸分組賽一席。

 

費倫天拿四強次回合加時下半場，補時階段入波，總比數4:3贏巴塞爾，驚險殺入決賽。佢哋整個賽事火力全開，共製造259次攻門，比第二位嘅根特多83次。而入球亦最多(14場入36球，多第二位韋斯咸9球)。首席射手Cabral同巴素爾嘅Amdouni暫時並列歐協聯神射手(各入7球)，而今季歐協聯兩位助攻王都係嚟自費倫天拿。佢哋喺星期六嘅意甲煞科戰，以3:1擊敗薩斯索羅。速度技術兼備嘅阿根廷翼鋒González雖然先居後備，換入後仍有進帳，近四場入4球，將以火熱狀態迎戰。

 

韋斯咸四強以總比數3:1 ，淘汰荷甲球隊阿爾克馬爾。佢哋聯賽曾經喺護級邊緣徘徊，踢歐洲賽就特別醒神，今季以不敗之身(贏13和1)進入決賽，場上充滿拼勁。領隊Moyes呢兩季喺歐洲賽有好成績，但今季使咗1.6億英鎊，聯賽仍危危乎。有傳管理層早已開始物色新領隊人選，等候決賽賽果再作決定。韋斯咸攻力雖然唔及費倫天拿，但中場有爛打嘅Rice，鋒線主力Antonio(歐協聯6個入球)，Bowen，Benrahma嘅互相配合，以及球隊嘅超強爭勝心，相信呢場決賽會係五五波，兩隊嘅臨場表現會決定勝負。

 

預計兩隊正選陣容：

【費倫天拿】
Terracciano - Dodô, Quarta, Milenković, Biraghi - Mandragora, Amrabat - González, Bonaventura, Ikoné - Cabral

 

【韋斯咸】
Aréola - Kehrer, Zouma, Aguerd, Cresswell - Souček, Rice, Paquetá - Bowen, Antonio, Benrahma