今次嘅東岸決賽係由邁阿密熱火對戰波士頓塞爾特人絕對係話題多多。先係由上季冠軍賽陣中多名主要球員輪流傷退嘅情況下以四比二惜敗勇士嘅塞爾特人，到今年捲土重來以東區第二嘅成績打入東區冠軍賽，勢要奪得上年失落嘅總冠軍。佢哋今年東區冠軍賽遇上嘅對手係被譽為最強黑馬嘅邁阿密熱火。

今季嘅熱火以44勝38負排名第7嘅情況下，喺附加賽先輸俾亞特蘭大老鷹再贏芝加哥公牛奪得東區季後賽最後一個名額。喺首輪對戰聯盟第一種子密爾沃基公鹿以4-1爆冷淘汰公鹿，再喺第二輪以4-2擊敗近世紀首次打入第二輪嘅紐約人。總教練Erik Spoelstra同Jimmy Butler嘅表現十分精彩。先嚟講講Spoelstra點樣盡顯教練功架，喺兩名陣中有重要角色嘅球員包括Tyler Herro喺第一場對公鹿右手手指受傷預計最早6月2號先可以復出，同Victor Oladipo第三場左膝受傷導致賽季報銷底下，Spoelstra仍然可以打個10人輪換降低球員嘅體力消耗。要知道NBA季後賽多數球隊都會選擇打一個七人至八人嘅輪換以確保場上球員嘅質素，Spoelstra作出呢一個選擇並唔容易，有8名球名上陣時間高於17分鐘剩低嘅兩名球員都有大約9分鐘嘅上場時間。就係因為呢個調動令到熱火嘅球員可以保持佢哋嘅體力同專注力執行高強度防守戰術。喺對戰紐約人嘅系列裏面可以見到教練對Jalen Brunson防守上作出針對性部署，以限制佢嘅得分能力。紐約人嘅3分命中率係咁多對季後賽球隊裏面最低嘅一隊，只有29.2%。見到呢個機會嘅Spoelstra決定放空紐約人嘅3分改為收集防守區域，務求有多啲球員可以喺禁區補防Brunson干擾佢嘅出手。而呢個方法亦都十分成功，喺頭四場入邊有三場Brunson咁命中率都唔過5成而呢三場紐約人全部都輸晒，唯一一場52.6%命中率就成為將紐約人喺呢個系列裏面唯一嘅勝場。喺咁好嘅戰術睇吓再配合上Jimmy Butler場均31.1分51.8%命中率6.6籃板5.6助攻加上2.2偷波嘅全面表現，完美演繹two-way player嘅特質。而且熱有將近七名球員場均得分有雙位數，可以話係眾志成城向着總冠軍進發。而佢哋亦都喺呢兩場作客塞爾特人嘅比賽全勝以2-0返到邁阿密主場，有好大嘅優勢進入總決賽。

另一方面嘅塞爾特人情況並唔樂觀，佢哋嘅主要得分手段來自於3分波，雖然有季後賽球隊入邊最高嘅3分命中率高達39.3%，但同時間呢個都成為咗佢哋嘅雙面刃。球隊主力被譽為NBA下一代門面嘅Jason Tatum就十分之依賴3分，場均3分出手去到8.7球而命中率有35.4%。喺兩場對陣熱火嘅比賽入邊佢場均得分雖然有30分但3分波嘅表現比較飄忽第一場3中1同埋第二場10中3，兩場都去唔到佢自己平均嘅水平。陣中另一名得分核心Jaylen Brown嘅表現亦都會大幅影響塞爾特人嘅成績，場均23.9分嘅佢加上Tatum嘅28.7分已經高過塞爾特人季後賽一半嘅得分。喺同費城七六人大戰七場之後體力上已經有劣勢而兩位嘅上陣時間都多過37分鐘，Tatum已經連續兩場喺第四節 0 FG，而第二場對熱火嘅比賽塞爾特人嘅雙子星喺第四節同樣 0 FG證明佢哋嘅體力同埋專注度都唔足以應付頻密同長時間嘅比賽。相比起熱火佢哋嘅鬥心明顯唔夠。係輸咗兩場主場之後接住落嚟兩場都要作客熱火，教練可以點樣改善球員出現疲態嘅問題，以及點樣破解熱火嘅防守同佢哋嘅針對性部署，加上用咩策略去限制Jimmy Butler嘅輸出將會係佢哋可唔可以成功扭轉劣勢嘅關鍵。