19/05/2022 法蘭克福 vs 格拉斯哥流浪 - 賽前分析
足球資訊 | 歐霸盃(2021/22) | 發布日期: 19/05/2022
排名: 德甲(11) vs 蘇超(2)
今年歐霸決賽戲碼都幾冷，德甲法蘭克福最威一次係贏咗1980年歐協（歐霸前身），蘇超格拉斯哥流浪就更耐，只係1972年贏過更古老嘅歐洲盃賽冠軍盃，兩隊上次碰頭已經係1960年嘅歐協盃四強。
法蘭克福近年歐賽異軍突起，2019年更打到入四強，僅輸俾當屆冠軍車路士。今季德甲教練大執位，法蘭克福被動換入嘅加斯拿帶隊踢德甲成績可以話係完全唔合格（第11名），但出奇地去到歐霸賽場就冇乜受影響，今季更加係再進一步殺入決賽，四強更淘汰班霸巴塞隆拿，相信唔少人都大跌眼鏡。法蘭克福呢場決賽冇咗重傷收咧嘅後衛軒迪列加，今季新加盟立即上位嘅丹麥攻中連特史唐則已經養傷咗一排，暫時預佢趕得切復出踢正選，如果唔得嘅話法蘭克福嘅Plan A、Plan B喺上一場作客緬恩斯（2:2）就已經一早曝晒光。
格拉斯哥流浪度過動蕩十年，由降落第四級嘅蘇乙再爬番上嚟，上季終由謝拉特帶領重奪蘇超冠軍。今季謝拉特轉投維拉，新帥兼前球員雲邦賀斯接手後雖然未能衛冕，但歐賽就比上季嘅十六強大幅進步，晉級過程淘汰嘅對手以多蒙特、RB 萊比錫最具分量。「格流」上週末聯賽煞科戰已經爭標無望，所以幾乎出晒副選去踢。反觀法蘭克福因為教練風格、爭排名獎金等原因，上星期一場看似無關痛養嘅煞科戰都出晒原班人馬。到底係保持節奏、默契緊要啲定還是保留體力緊要啲，今晚喺西維爾就會俾到答案。
相關內容:
19/05/2022 法蘭克福 vs 格拉斯哥流浪 - 賽前分析
19/05/2022